Qaraqalpaqstan Respublikasi' Ministrler Ken'esi

Qaraqalpaqstan Respublikasi'ni'n' Ma'mleketlik hu'kimet portali'


ӨЗБЕКИСТАН РЕСПУБЛИКАСЫ ПРЕЗИДЕНТИ ЛАЎАЗЫМЫНА КИРИСИЎ САЛТАНАТЛЫ МӘРЕСИМИНЕ БАҒЫШЛАНҒАН ОЛИЙ МАЖЛИС ПАЛАТАЛАРЫНЫҢ ҚОСПА МӘЖИЛИСИ ҲАҚҚЫНДА МӘЛИМЛЕМЕ

Betti PDF ta'rizde ju'klep ali'w Betti PDF ta'rizde ju'klep ali'w (64 Kb)    Versiyasi'    Betti doc ta'rizde ju'klep ali'w (64 KB)

O‘zbekiston Respublikasi Prezidenti lavozimiga kirishish tantanali marosimiga bag‘ishlangan Oliy Majlis palatalarining qo‘shma majlisi to‘g‘risida axborot

Ташкентте 2016-жыл 14-декабрь күни Өзбекистан Республикасы Президенти лаўазымына кирисиў салтанатлы мәресимине бағышланған Олий Мажлис Нызамшылық палатасы ҳәм Сенатының қоспа мәжилиси болып өтти.

Салтанатлы мәресимде Өзбекистан Республикасы ҳүкиметиниң ағзалары, министрликлер менен ведомстволардың басшылары, Орайлық сайлаў комиссиясының ағзалары, елимиздеги шет мәмлекетлердиң елшиханалары ҳәм халықаралық шөлкемлер ўәкилханаларының басшылары, елимиздиң ҳәм шет ел ғалаба хабар қуралларының ўәкиллери қатнасты.

Қоспа мәжилисти, Өзбекистан Республикасы Орайлық сайлаў комиссиясының баслығы М.Абдусаломов ашты. Ол жерлеслеримиз өзиниң жоқары сиясий мәдениятын, Ўатанымыз тәғдирине бийпарқ емеслик сезимин көрсетип, 2016-жыл 4-декабрь күни болып өткен Өзбекистан Республикасы Президентин сайлаўда белсене қатнасқанын атап өтти. Сайлаў процесин 5 халықаралық шөлкем ҳәм 46 мәмлекеттен 600 ге шамалас бақлаўшы бақлап барды. Бул Өзбекистан Президентин сайлаў демократиялық талапларға толық сәйкес түрде, миллий сайлаў нызамшылығы ҳәм халықаралық стандартлар шеңберинде, ашық-айдын ҳәм жәриялылық пенен өткениниң айқын дәлили болып табылады.

Жоқары дәрежеде болып өткен Өзбекистан Республикасы Президентин сайлаўда Исбилерменлер ҳәрекети - Өзбекистан Либерал-демократиялық партиясынан талабан Шавкат Миромонович Мирзиёев сайлаўшылар улыўма санының 88,61 процент даўысын алып жеңиске еристи.

Орайлық сайлаў комиссиясының баслығы залға жыйналғанлардың ҳәм сайлаўшылардың атынан Шавкат Мирзиёевты Өзбекистан Республикасы Президенти болып сайланғаны менен шын жүректен қутлықлады ҳәм Өзбекистан Республикасы Президенти гүўалығын, Өзбекистан Республикасы Орайлық сайлаў комиссиясының гүўаҳнамасын тапсырды.

Өзбекистан Республикасы Конституциясының 92-статьясына муўапық Президент Шавкат Мирзиёев ант қабыл етти` «Өзбекистан халқына садық хызмет етиўге, республиканың Конституциясы ҳәм нызамларына қатаң бойсыныўға, пуқаралардың ҳуқықлары ҳәм еркинликлерине кепиллик бериўге, Өзбекистан Республикасының Президентине жүкленген ўазыйпаларды ҳақ нийет пенен орынлаўға салтанатлы түрде ант беремен».

Өзбекистан Республикасының мәмлекетлик гимни жаңлады.

Салтанатлы мәресимде Өзбекистан Республикасы Президенти Шавкат Мирзиёев шығып сөйледи.

Усының менен Өзбекистан Республикасы Президенти лаўзымына кирисиўге бағышланған салтанатлы мәресим жуўмақланды.

Тәнепистен соң Олий Мажлис палаталарының қоспа мәжилисинде Өзбекистан Республикасы Бас министри лаўазымына талабанды тастыйықлаў мәселеси көрип шығылды.

Мәжилисти Олий Мажлис Нызамшылық палатасының Спикери Н.Исмоилов басқарды.

Елимиз Конституциясының 98-статьясы тийкарында Өзбекистан Республикасы Бас министри кандидатурасы Өзбекистан Республикасы Олий Мажлисиниң Нызамшылық палатасына сайлаўда ең көп депутатлық орынларын алған сиясий партия тәрепинен көрип шығыў ушын Өзбекистан Республикасы Президентине усыныс етиледи. Усыған муўапық Исбилерменлер ҳәрекети - Өзбекистан Либерал-демократиялық партиясы сиясий кеңесиниң жақында болып өткен мәжилисинде Бас министр лаўазымына кандидат көрсетилди.

Өзбекистан Республикасы Президенти Шавкат Мирзиёев Өзбекистан Республикасы Бас министри лаўазымына елимиз Бас министриниң орынбасары лаўазымында ислеп киятырған Абдулла Ниғматович Ариповтың кандидатурасын усыныс етти.

- Биз бул мәселе бойынша жүдә көп ойлап, тийисли мәсләҳәтлер алып бардық. Өзбекистан Либерал-демократиялық партиясының басшылығы ҳәм белсендилери менен де ҳәр тәреплеме мәсләҳәтлестик, - деди Шавкат Мирзиёев. - Өткерилген додалаўларда билдирилген барлық пикир-усынысларды итибарға ала отырып, мен бул лаўазымға әмелий саладағы және орайлық уйымлардағы көп жыллық басқарыў тәжирийбесине ийе болған, 11 жыл даўамында Бас министрдиң орынбасары болып ислеген Абдулла Ниғматович Ариповтың кандидатурасын усыныс етемен.

 Елимиздиң басшысы жыйналғанларды А.Ариповтың өмирбаяны менен таныстырды. Оның кәсиплик маманлығы, билим ҳәм тәжирийбеси, инсаныйлық пазыйлетлери ҳаққында айтып өтти.

Ҳәммемиз жақсы билемиз, ҳәзирги ўақытта пүткил дүньяда мәлимлеме-коммуникация технологиялары дәўири, деди Шавкат Мирзиёев.  Бул сала саат сайын тез пәт пенен раўажланбақта. Бүгинги күнимизди ҳәм келешегимизди, бул саланың раўажланыўысыз көз алдымызға келтириў мүмкин емес.

Бүгинги күнде елимизде «Электрон ҳүкимет» системасына өтиў бағдарында жүдә үлкен жумыслар басланған ҳәм оларды басқышпа-басқыш логикалық даўам еттириў әҳмийетли ўазыйпа сыпатында күн тәртибинде турақлы түрде турады.

Мәлимлеме-коммуникация технологиялары саласы қаншелли раўажланған сайын, оның абзаллығы ҳәм қолайлықларынан пайдаланыў менен бир қатарда, пүткил елимизде мәлимлеме қәўипсизлигин тәмийинлеў ең әҳмийетли мәселеге айланып бармақта.

Соның менен бир қатарда, соңғы еки ай даўамында Бас министрдиң электрон порталына келип түскен 270 мыңнан аслам мүрәжат, сондай-ақ, жаңадан шөлкемлестирилип атырған «Халық қабыллаўханалары»на болатуғын мүрәжатлердиң шешими бойынша да анық ҳәм оператив жумыс системасын жаратыў талап етиледи. Бул жумыслардың басында тиккелей ҳүкимет басшысының жеке өзи турыўы зәрүр, деди Президентимиз.

Абдулла Ариповтың тиккелей хызмет ўәкиллигине кирмейтуғын қосымша ўазыйпаларды да тапсырып, бул инсанды көп мәрте ҳәр тереплеме сынақтан өткергенмен.

Бул инсанның елимизде бармаған ўәлаяты, қала ҳәм районы, кирмеген атызы, қурылыс, мәдений-турмыслық, саўда объектлери қалмаған. Сол себепли елимиз аймақларындағы шараятты, машқала ҳәм мәселелерди жүдә жақсы биледи. Ең тийкарғысы, барған ҳәм көрген жериндеги мәселени жеке өзи бийғәрез шешеди, егер шеше алмаса, анық усыныс береди.

Елимиз басшысы А.Ариповтың жыллы мүнәсибети, адамлар менен тил табысыў қәбилети, машқала ҳәм мәселени тыңлаўда ҳәм түп-тийкарына жетип, оның шешими бойынша әдалатлы қарар қабыл етиў поитенциалын айрықша атап өтти.

А.Арипов бүгинги күнде алдымызда турған жүдә үлкен мәселелерди шешиўде, яғный елимизди модернизациялаўды ҳәм жаңалаўды жаңа басқышқа көтериў, нызам үстинлигин ҳәм инсан мәплерин тәмийинлеў бойынша бағдарламалық ўазыйпаларды әмелге асырыўда Министрлер Кабинети жумысын нәтийжели тийкарда шөлкемлестириў, Бас министр орынбасарлары, ҳүкимет ағзалары, министрликлер менен ведомстволар, барлық дәрежедеги ҳәкимликлердиң басшылары менен бир жағадан бас шығарып, беккем аўызбиршиликте ислеў потенциалына ийе. Ол өзине жүкленген ҳәр қандай тапсырмаға, үлкен яки киши деместен, бирдей жуўапкершилик пенен қатнаста болады, сөзсиз орынлаў ҳәм логикалық жуўмағына жеткериў илажларын көреди.

Және бир инсаныйлық пазыйлети – ҳадаллығы, адамларға бәрқулла ҳүрмет пенен қараўы, олардың дәртине дәрман болыўға умтылыўы, Ўатанымызға ҳәм халқымызға садықлығы болып табылады.

Сиз, ҳүрметли депутат ҳәм сенаторлардан, Өзбекистан Республикасы Бас министри лаўазымына усынылып атырған Абдулла Ниғматович Ариповтың кандидатурасын қоллап-қуўатлаўыңызды сорайман, деди мәмлекетимиз басшысы.

А.Арипов Өзбекистан Республикасы Министрлер Кабинетиниң жақын ҳәм орта перспективасына мөлшерленген Ҳәрекет бағдарламасы ҳаққында шығып сөйледи.

Мәжилисте шығып сөйлегенлер Президентимиздиң баянатында атап өтилген тийкарғы бағдарларды қоллап-қуўатлады. Өзбекистан Республикасы Бас министри лаўазымына усынылған А.Ариповтың кандидатурасын мақуллады. Олий Мажлис палаталары А.Ариповты Өзбекистан Республикасы Бас министри лаўазымына тастыйықлаў ҳаққында қарар қабыл етти.

Усының менен Өзбекистан Республикасы Олий Мажлиси Нызамшылық палатасы ҳәм Сенатының қоспа мәжилиси жуўмақланды.

 

ӨзА


Sa'ne: 15.12.2016 11:11, 791 ma'rte ko'rip shi'g'i'ldi'