Qaraqalpaqstan Respublikasi' Ministrler Ken'esi

Qaraqalpaqstan Respublikasi'ni'n' Ma'mleketlik hu'kimet portali'


ҮСТИРТТЕГИ ЗАМАНЫМЫЗ ҚАҲАРМАНЛАРЫ

Betti PDF ta'rizde ju'klep ali'w Betti PDF ta'rizde ju'klep ali'w (56 Kb)    Versiyasi'    Betti doc ta'rizde ju'klep ali'w (56 KB)

Усы жыл 21-январь күни пайтахтымыздағы Бердақ атындағы Қарақалпақ мәмлекетлик музыкалы театрында «Өзбеккино» Миллий агентлиги, «Қарақалпақфильм» студиясы, «Өзбекнефтьгаз» Миллий холдинг компаниясы ҳәм Кореяның бир топар жетекши компаниялары тәрепинен сүўретке алынған «Әсир қурылысы» ҳәм «Үстиртке жол» фильмлерин таныстырыў болып өтти. Бул фильмлерде Сүргил кәни негизинде Үстирт газ-химия комплексиниң жаратылыў тарийхы, үлкен жойбардың пайда болыўы ҳәм әмелге асырылыўы, жас талантлы қәнигелердиң алып барған жумыслары менен турмысы өз сәўлелениўин тапқан.

Илажға фильмниң дөретиўшилери, илимпазлар, нефт-газ саласының қәнигелери, студент-жаслар ҳәм кең жәмийетшилик ўәкиллери қатнасты.

 Онда Өзбекистан Республикасы Олий Мажлиси Сенатының ағзасы, көркем фильмниң сценарий авторларының бири Г.Аннақлычева, «Өзбекнефтьгаз» Миллий холдинг компаниясы Баспасөз хызметиниң баслығы Т.Саламатина, «Uz-KorGa! Chemical» биргеликтеги жуўапкершилиги шекленген жәмийетиниң бөлим баслығы Чон Мон Ю, фильмниң постановкашы режиссёры А.Ғаниев ҳәм басқалар шығып сөйлеп, фильмниң дөретилиў тарийхы туўралы кең түрде мағлыўматлар берди.

Атап өтилгениндей, углеводород шийки затын қайта ислеўге қәнигелестирилген елимиз тарийхындағы ең ири инвестициялық жойбарды әмелге асырыўдың ҳәр бир басқышы халықаралық нефтьгаз қәнигелери ушын ҳақыйқый сенсацияға айланды. Азғана ўақыт ишинде Үстирт газ-химия комплекси бир қатар халықаралық сыйлықларды алып, дүнья жәмийетшилигине кеңнен мәлим болды. Атап айтқанда, «Project Finanse International Magazine» Халықаралық баспасының версиясы бойынша 2012-жылдың ең ири келисими, PFI Thompson Reuters ҳәм PFM Euromoney мәлимлеме таллаў агентликлериниң халықаралық версиясы бойынша 2013-жылдың ең ири келисими, «Infrastructure Journal» халықаралық баспасының версиясы бойынша 2014-жылдың ең ири келисими деген дүнья жүзилик тән алыўларға ийе болды.

«LotteChemical», «KOGA!», «G!E&R» сыяқлы атақлы компаниялар усы жойбардың шериклери болып есапланады. Онда Кореяның Эксимбанки, KSURE, Азия раўажланыў банки, Корея қаржы корпорациясы, Корея раўажланыў банки, Қытай мәмлекетлик раўажланыў банки, ING – Банки, Гермес ҳәм бир қатар халықралық коммерциялық банклер қатнасты. Жәми улыўма баҳасы 3,9 миллиард долларға тең болған қурылыс тақыр жерде қурылып, ҳәзирги ўақытта онда бир ярым мың адам жумыс ислеп атырған атырған болса, соның 500 ден асламы колледж пикериўшилери болып есапланады.

Әне усы қәбилиетли жас қәнигелер  көркем фильмниң бас қаҳарманлары болды. Нәтийжеде турмыслық фильм жаратылып, онда заманымыз қаҳарманларының турмысы, изленислери, тынымсыз түрде алып барған мийнетлери өз сәўлелениўин тапты.

- Бизлер бул фильмди оғада қызығыўшылық пенен тамашалап отырдық,-дейди фильмге келген тамашагөйлердиң бири А.Қоңыратбаева. Онда биз сыяқлы жаслардың турмысы, бүгинги дәўир, елимиздеги жасларға жаратылған шараятлар, оннан утымлы пайдаланған жаслардың жетискенликлери, пайдаланбаған жаслардың да турмысы салыстырмалы түрде берилген. Фильмдеги қаҳарманлардың образлары актёрлар Б.Назарымбетов, А.Аңсатбаев, И.Сарсенбаева, М.Алланазарова, Ш.Матжанова, Н.Салманова ҳәм басқалар тәрепинен исенимли атқарылып, образлар анық ашып берилген.

Илажға Қарақалпақстан Республикасы Жоқарғы Кеңеси Баслығының орынбасары А.Ҳамраев қатнасты ҳәм шығып сөйледи.

                                                                                 ҚҚХА


Sa'ne: 25.01.2017 14:06, 350 ma'rte ko'rip shi'g'i'ldi'