МАШҚАЛАЛАР САПЛАСТЫРЫЛЫП, ХЫЗМЕТ КӨРСЕТИЎДИҢ САПАСЫ ЖАҚСЫЛАНАДЫ

Өзбекистан Республикасы Президенти Шавкат Мирзиёев жақында республикамызға сапары даўамында белсендилер менен болған ушырасыўда аймағымызды жақын келешекте социаллық-экономикалық жақтан раўажландырыў, халқымыз ушын мүнәсип турмыс шараятын жаратыў мәселелерине  тоқтап өтиў менен бир қатарда,  қала ҳәм районларымызды үзликсиз электр энергиясы, тәбийғый газ, көмир менен тәмийинлеў, жеткерип берилген ресурслар ушын қарыздарлықты өндириўдеги орын алып кемшиликлерди қатаң сынға алған еди.

Қарақалпақстан Республикасы Жоқарғы Кеңесинде усы машқалаларды сапластырыў бойынша алда турған әҳмийетли мәселелерге бағышланған дөгерек сәўбети болып өтти.

Илажда Өзбекистан Республикасы Бас министриниң орынбасары, геология, жанылғы-энергетика комплекси, химия, нефть-химия ҳәм металлургия санааты мәселелери комплексиниң басшысы Ғ.Ибрагимов, комплекске қараслы мәкеме, кәрхана, шөлкем басшылары, ғалаба хабар қуралларының ўәкиллери қатнасты.

Атап өтилгениндей, Өзбекистан Республикасы Президентиниң 2016-жыл 23-ноябрьдеги «2017-2021-жылларда төмен кернеўли тармақларды модернизациялаў ҳәм жаңалаў есабынан  республикамыздың қала ҳәм аўыл халқының электр энергиясынан пайдаланыўын жақсылаў Бағдарламасы ҳаққында»ғы қарарын орынлаў бойынша улыўма баҳасы 27,14 миллион АҚШ доллары болған жойбарды әмелге асырыў режелестирилген. Жойбардың 7,36 миллион АҚШ доллары «Өзбекэнерго» акционерлик жәмийетиниң қаржылары, 19,78 миллион АҚШ доллары акционерлик-коммерциялық «Өзсанаатқурылысбанк»тиң кредити есабынан қаржыландырылады. Бағдарлама шеңберинде 2017-2021-жылларда 1045,09 километр электр узатыў тармағы, 298 дана трансформатор пункти жаңаланып ҳәм реконструкцияланып, республикамыздың 128 өзин-өзи басқарыў уйымы аймағындағы 106623 тен аслам тутыныўшының тәмийнаты жақсыланады.

Электр энергиясын ислеп шығарыўда заманагөй технологиялардан пайдаланған ҳалда Тақыятас  ыссылық электр станциясында  улыўма қуўаты 566 МВт болған жаңадан 2 пуў-газ қурылмасын қурыў бойынша бас бөлип алыўшы менен шәртнама дүзилди. Соның менен бирге, санаат кәрханаларының тез пәт пенен раўажланып баратырғанлығын есапқа алып, оларға қосымша қуўатларды жеткерип бериў және беккемлигин арттырыў мақсетинде Азия раўажланыў банки менен биргеликте  Тақыятас  ыссылық электр станциясынан Сарымай подстанциясына шекем 220 кВ күшлениўши 364 километр узынлықтағы жойбар бойынша жумыслар баслап жиберилди.

Республикамызда бүгинги күни 231388 жеке хожалық тәбийғый, 87701 хожалық суйылтырылған газ бенен тәмийинленген. Соның менен бирге, жәми 5084 көтере тутыныўшыға, соннан 176 санаат кәрханасы, 2314 халыққа хызмет көрсетиўши кәрхана, 2594 исбилерменлик субъектине тәбийғый газ жеткерип берилмекте.

Дебиторлық қарызларды азайтыў, газден пайдаланыўшыларға еледе қолайлық жаратып бериў, хызмет көрсетиўдиң сапасын жақсылаў мақсетинде қалалық ҳәм районлық газ филиаллары 50 ири аймаққа бөлинип, оларға 100 дана заманагөй электрон газ есаплағыш үскенеси орнатылды ҳәм бүгинги күни тутыныўшылар менен есап-санақ жумыслары белгиленген аймақлар кесиминде жүргизилмекте.

2016-2017-жыллардың гүзги-қысқы мәўсимине таярлық көриў ҳәм оны өткериў бойынша реже ислеп шығылып, басқышпа-басқыш модернизациялаў, социаллық объектлер менен жеке турақ жайлардың газ тәмийнатын жақсылаў мақсетинде улыўма узынлығы 16,1 километр газ тармағын реконструкциялаў, 5,1 километрин ири оңлаў режелестирилген. Нәтийжеде 16129 хожалықтың газ тәмийнаты жақсыланады. Мәўсимге таярлық жумысларын сапалы алып барыў, авариялық ҳалатларды тез сапластырыў ушын 6 дана DAMAS, 5 дана LABO, 33 дана мотороллер сатып алынды ҳәм олар бүгинги күни хызмет көрсетпекте.

Республикамыздың халқын суйылтырылған газ бенен үзликсиз тәмийинлеў бойынша  быйылғы жылы 14476 дана жаңа газ баллоны алып келинип, хожалықларға жеткерип бериледи. Өткен жылы сыйымлылығы 1000  тонна болған  Нөкис суйылтырылған газ толтырыў базасында ири оңлаў жумыслары алып барылды. Буннан тысқары, Әмиўдәрья районында сыйымлылығы 45, Беруний районында 54, Қоңырат районында 50, Шымбай районында 50 тонналық газ баллонларын толтырыў шақапшалары ислеп тур. Бул жерлерге газ баллонларын сынақтан өткериў үскенелери орнатылмақта.

Суйылтырылған газди заводтан иркинишсиз алып келиў ушын сыйымлылығы 22-32 тонналық 21 вагон цистерна ижараға алынып, сыйымлылығы 18-22 тонна болған 4 дана MAN маркалы автотранспорттан пайдаланылмақта. Бул суйылтырылған газди хожалықларға жеткерип бериў ушын 24 дана арнаўлы ISUZI маркалы автомашина ажыратылды.

 Быйылғы жылы 17,6 километр газ тармағын ири оңлаў, 15,1 километрин реконструкциялаў, солай етип 32935 хожалықтың газ тәмийнатын жақсылаў режелестирилген. Жыл даўамында тутыныўшыларға 850  миллион метр куб тәбийғый газ, 11725 тонна суйылтырылған газ жеткерип бериледи. Елликқала, Төрткүл, Кегейли районлық газ тармақлары филиалларының ҳәкимшилик имаратларын реконструкциялаў, район аймақларында сыйымлылығы 500 дана газ баллонын тарқатыўшы сервис орайларын қурыў, Тахтакөпир, Қараөзек, Нөкис, Хожели, Қоңырат районлық газ филиалларының ҳәкимшилик имаратларын ири оңлаў белгиленген.

Илажда Нөкис қаласындағы полимер өнимлери заводы, энергия тармағы өнимлерин ислеп шығаратуғын завод, басқа да жаңадан қурылатуғын объектлерди электр энергиясы, тәбийғый газ бенен үзликсиз тәмийинлеў, исбилерменлерге сапалы хызмет көрсетиў, халықтың орынлы наразылықларын сапластырыў бойынша мәселелер кең түрде сөз етилди.

Дөгерек сәўбети жуўмағында пуқаралардан келип түскен бир қатар сораўларға жуўап берилди.

 

Д.АБИБУЛЛАЕВ,

Қарақалпақстан хабар агентлигиниң хабаршысы.


Sa'ne: 2017-02-01 09:26:09, Ko'rip shi'g'i'ldi': 500