Qaraqalpaqstan Respublikasi' Ministrler Ken'esi

Qaraqalpaqstan Respublikasi'ni'n' Ma'mleketlik hu'kimet portali'


САЛТАНАТЛЫ ТУРДЕ БЕЛГИЛЕНДИ

Betti PDF ta'rizde ju'klep ali'w Betti PDF ta'rizde ju'klep ali'w (54 Kb)    Versiyasi'    Betti doc ta'rizde ju'klep ali'w (54 KB)

Быйыл Қарақалпақстан Республикасы Конституциясының қабыл етилгенине 24 жыл толды. Усы сәнеге байланыслы өткерилип атырған мәдений-ағартыўшылық илажларда тийкарғы Нызамымыз халық мәпи ушын хызмет ететуғыны ҳәм оның тыныш-татыў турмысын тәмийинлейтуғыны атап өтилмекте. Ғәрезсизлик жылларында ерискен теңи-тайы жоқ табысларымыз, тыныш-татыў, абадан турмысымыз, нәўқыран әўлад тәрбиясына айрықша ғамқорлық – булардың барлығының негизинде Конституциямыз тур. Өйткени, Тийкарғы нызамымыз демократиялық ҳуқықый мәмлекет қурыў, инсан ҳуқықларының үстинлигин, тынышлық-татыўлықты тәмийинлеўдей ийгиликли мақсетлерге хызмет етпекте. Соның менен бирге, Конституциямыз халқымызды бирлестириўши, миллетлераралық дослықты беккемлеўши, уллы дөретиўшилик ислерге руўхландырыўшы ҳуқықый ҳүжжет болып есапланады.
8-апрель күни пайтахтымыздағы Бердақ атындағы Қарақалпақ мәмлекетлик академиялық музыкалы театрында Қарақалпақстан Республикасы Конституциясының 24 жыллығына бағышланған салтанатлы мәжилис болып өтти. 
Илажға Қарақалпақстан Республикасы Жоқарғы Кеңеси Баслығының орынбасары А.Хамраев, парламенттиң комитет баслықлары, республика ҳүкиметиниң ағзалары, министрликлер менен ведомстволардың басшылары, жоқары ҳәм орта арнаўлы оқыў орынларының профессор-оқытыўшылары, студентлер, жәмийетшилик ўәкиллери қатнасты. 
Өзбекистан ҳәм Қарақалпақстан Республикаларының мәмлекетлик гимнлери атқарылды. 
Қарақалпақстан Республикасы Жоқарғы Кеңесиниң комитет баслығы С.Турманов байрамға арнап баянат жасады. 
Илажда Бердақ атындағы Қарақалпақ мәмлекетлик университетиниң студенти, Наўайы атындағы мәмлекетлик стипендияның ийеси З.Исмайлова, Қарақалпақстан халық шайыры К.Кәримов қутлықлаў сөз сөйледи. 
Салтанатлы мәжилис қатнасыўшыларына Бердақ атындағы Қарақалпақ мәмлекетлик академиялық музыкалы театры дөретиўшилик жәмәәтиниң «Едиге» музыкалы драмасы қойып берилди. 
Қарақалпақстан Республикасы Конституциясы күнине бағышланған байрам илажлары барлық қала ҳәм районларда, жоқары ҳәм орта арнаўлы оқыў орынларында, мийнет жәмәәтлеринде кең түрде белгиленип өтти.

Қарақалпақстан хабар агентлиги


Sa'ne: 18.04.2017 10:24, 46 ma'rte ko'rip shi'g'i'ldi'