Qaraqalpaqstan Respublikasi' Ministrler Ken'esi

Qaraqalpaqstan Respublikasi'ni'n' Ma'mleketlik hu'kimet portali'


БИРГЕЛИКТЕГИ ИЛАЖЛАРДЫН УНАМЛЫ НАТИЙЖЕСИ

Betti PDF ta'rizde ju'klep ali'w Betti PDF ta'rizde ju'klep ali'w (64 Kb)    Versiyasi'    Betti doc ta'rizde ju'klep ali'w (64 KB)

Қарақалпақстан Республикасы Ишки ислер уйымлары тәрепинен пуқаралардың нызамлы мәплерин, ҳуқықлары менен еркинликлерин қорғаў, жынаятшылықтың ҳәм ҳуқықбузарлықтың алдын алыў бағдарында кең көлемли илажлар әмелге асырылды. Усындай әҳмийетли ўазыйпаларды атқарыўда баслы итибар нызам үстинлигин тәмийинлеўге, кең жәмийетшилик пенен бирге ислесиўди күшейтиўге, халықтың ҳуқықый билимин жетилистириў арқалы ҳуқықбузарлық профилактикасының нәтийжелилигин арттырыўға қаратылмақта. Бүгинги глобалласыў дәўири елимизде тынышлықты және турақлылықты сақлаўды, миллетлер ҳәм динлераралық аўызбиршиликти, өз-ара ҳүрмет, мийрим-шәпәәтти беккемлеўди талап етпекте. Усындай бир пайытта ҳәр бир басшы белгиленген тапсырмаларды булжытпай орынлаў күнделикли тийкарғы ўазыйпасы екенлигин терең сезинип, үлкен жуўапкершилик және жигерлилик пенен мийнет етиўи тийис. -Ҳүрметли Президентимиз Шавкат Мирзиёев өзиниң сайлаў алды ушырасыўларында, Өзбекистан Республикасы Конституциясы қабыл етилгенлигиниң 24 жыллығына бағышланған салтанатлы мәресимде, Прокуратура уйымлары хызметкерлериниң кәсиплик байрамы мүнәсибети менен болып өткен ушырасыўда, усы жыл 9-февраль күнги Ишки ислер уйымларының жумысына, тараўдағы машқалалар менен кемшиликлерге, алдағы ўазыйпаларға бағышланған видеоселектор мәжилисинде шығып сөйлеген сөзлеринде ҳуқық қорғаў уйымлары алдына кең көлемли ўазыйпалар қойды,- дейди Қарақалпақстан Республикасы Ишки ислер министри, полковник Айтбай Темирханов.- Быйылғы «Халық пенен пикирлесиў ҳәм инсан мәплери жылы»нда жынаятлардың келип шығыў себеплери, оларды келтирип шығаратуғын шараятлар және факторларды үйрениў, профилактика мақсетинде ҳәр бир жынаятты Ишки ислер уйымларының басшылары, профилактика инспекторлары ҳәм пуқаралар жыйынлары белсендилериниң қатнасында терең талқылаў бүгинги күнниң әҳмийетли мәселеси екенлигин атап өтти.
Өткен жыл даўамында республикамыз аймағында оперативлик жағдайды турақластырыў, пуқаралардың ҳуқықларын қорғаў, жынаятшылықтың алдын алыў ҳәм оған қарсы гүресиў, жас өспиримлер, жаслар арасында жүз берип атырған ҳуқықбузарлықлардың алдын алыў бағдарында мәмлекетлик уйымлар, пуқаралардың өзин-өзи басқарыў уйымлары менен биргеликте әмелге асырылған илажлар өзиниң унамлы нәтийжесин берди. Атап айтқанда, өзлериниң нызамлы ҳуқықларын қорғаў мақсетинде министрликке 26643 пуқара арза менен мүрәжат еткен болса, соннан 24 мыңнан асламының талабы қанаатландырылды. Жәмийетлик орынларда нызам бузыўшылыққа жол қойған 1426 пуқараға суд тәрепинен тийисли жаза қолланылып, 4056 пуқара ескертилди. Қәнигелеримиз тәрепинен 5900 пуқараға ҳуқықый мәсләҳәт берилди.
Кең жәмийетшилик пенен биргеликтеги оператив-профилактика илажларының өткерилиўи нәтийжесинде республикамыз аймағындағы 402 пуқаралардың өзин-өзи басқарыў уйымының 63 инде бирде-бир жынаят жүз бермеди. Улыўма жынаяттың жүдә аўыр түри, жынаят излеў тараўындағы жынаятлардың жүдә аўыр түрлери, топарлар тәрепинен исленген жынаят, соның нәтийжесинде аўыр дене жарақатын алыў, алдаўшылық, жас өспиримлер тәрепинен исленген жынаятлардың азайыўына ерисилди. Жынаят ислеп тергеў және суд уйымларынан қашып жүрген 325 пуқара, диний экстремистлик ағымның еки ағзасы усланып, бийдәрек жоғалған 29 пуқара жасаў орынларына қайтарылды.
Республикамыз аймағында оқ атар қураллары менен байланыслы жынаятлардың, соның себебинен келип шығатуғын кеўилсиз ҳәдийселердиң алдын алыў мақсетинде еки мәрте «Арсенал» илажы өткерилиўи барысында усындай қуралларды нызамсыз сақлағаны ушын 119 пуқара жынайый жуўапкершиликке тартылды. Қарақалпақстан Республикасы Жоқарғы Кеңеси ҳәм Министрлер Кеңесиниң басламасында өз үйлеринде оқ атар қуралларын сақлап атырған пуқаралардың ықтияры менен тапсырыўы бойынша үгит-нәсият жумыслары алып барылды. Республикамыз бойынша 100 ден аслам пуқара қуралларын тапсырып, ҳәр бири 50 мың сумнан сыйлықланды. Нәтийжеде оқ атар қураллары менен байланыслы болған бахытсыз ҳәдийсе ушыраспады. Бул жумыслар быйылғы жылы да даўам етпекте.
Деген менен, өткен дәўирде жаслар, жас өспиримлер, соның менен бирге, ҳаял-қызлар қатнасындағы ҳуқықбузарлықлар менен жынаятлардың, олар арасында өз жанына қастлық етиўдиң алдын алыўда пуқаралардың өзин-өзи басқарыў уйымлары, Ҳаял-қызлар комитетлери, оқыў орынлары менен бирге ислесиўде айтарлықтай нәтийжеге ерисе алмадық. Атап айтқанда, өткен жылы жас өспиримлер тәрепинен исленген жынаятларда кәсип-өнер колледжиниң 47, улыўма билим бериў мектебиниң 14 оқыўшысының қатнасқанлығы бәршемизди тәшўишке салады. Булардың көпшилиги урлық жынаяты болып табылады. Сонлықтанда келешегимиз болған жас әўладты ана-Ўатанға садықлық, жасы үлкенге ҳүрмет, кишиге иззет руўхында тәрбиялаўымыз, олардың ҳуқықый билимин жетилистирип барыўымыз, ҳуқықлары менен еркинликлеринен кеңнен пайдаланыўына, солай етип, жәмийетте өзиниң ылайықлы орнын табыўына жәрдемлесиўимиз тийис.
Жас өспиримлер арасында жынаятшылықтың ҳәм ҳуқықбузарлықтың алдын алыў баслы ўазыйпа болып қалмақта. Өткен жыл даўамында 212 жас өспирим түрли көринистеги тәртип бузыўшылыққа жол қойғаны ушын иски ислер уйымларында есапқа алынды. Перзент тәрбиясына немқурайдылық пенен қараўшы 129 ата-ана анықланып, хызметкерлеримиз тәрепинен белгиленген тәртипте профилактикалық илаж өткерилди. Улыўма билим бериў мектеплери менен кәсип-өнер колледжлеринде өткерилген «Даўамат» илажы шеңберинде оқыў орнын таслап, күнделикли сабақларға қатнаспай жүрген, ҳәттеки, шет еллерге кетип қалған 100 ден аслам оқыўшы қайтарылды. Жас өспиримлер тәрепинен исленген ҳуқықбузарлықлар және жынаятлар оқыў орнының басшылары, ата-аналардың қатнасында талқыланып, тийисли тәсир шаралары көрилди. Соның нәтийжесинде жас өспиримлер тәрепинен исленген аўыр ҳәм жүдә аўыр жынаятлар санының азайыўына ерисилди.
Ҳүрметли Президентимиз Ш.Мирзиёев тәрепинен ҳәр ҳәптениң пийшемби күни елимизде «Жынаятшылықтың алдын алыў ҳәм профилактика күни» деп белгилениўи жынаятшылықтың алдын алыў, ҳуқықбузарлық профилактикасын тәмийинлеў, халық пенен еле де тығыз бирге ислесиўди беккемлеўге хызмет етпекте. Ҳәр пийшемби күни қала ҳәм районларымызда өткерилип атырған илажларда жүз берип атырған жынаятлардың келип шығыў себеплери, оның ақыбетлери кең жәмийетшилик қатнасында талқыланып барылмақта. Бул тәжирийбе өзиниң унамлы нәтийжесин бермекте. Атап айтқанда, илаж шеңберинде жынаят ислеп, тергеў ҳәм суд уйымларынан қашып жүрген 69 пуқара усланған болса, бийдәрек жоғалған 9 пуқара жасаў орынларына қайтарылды. Республикамыз аймағында жәмийетлик-сиясий турақлылықты сақлаў, тынышлықты тәмийинлеў, жынаятшылықтың ҳәм ҳуқықбузарлықтың алдын алыўға қаратылған илажлар даўам етпекте.
Өзбекистан Республикасы Президентиниң усы жыл 10-апрель күнги «Ишки ислер уйымларының жумыс нәтийжелилигин түп-тийкарынан арттырыў, жәмийетлик тәртипти, пуқаралардың ҳуқықларын, еркинликлери менен нызамлы мәплерин исенимли қорғаўды тәмийинлеўде олардың жуўапкершилигин күшейтиў илажлары ҳаққында»ғы Пәрманы бул бағдардағы әҳмийетли ҳүжжетлерден бири болды. Бул тараўда жол қойылған қәте-кемшиликлерден тийисли жуўмақ шығарыў, нызам үстинлигин тәмийинлеў, ҳуқықбузарлықлар профилактикасын нәтийжели әмелге асырыўға хызмет етиўи менен бирге ҳәр биримизге қатаң ўазыйпа, айрықша жуўапкершилик, соның менен бирге белгиленген хызмет ўазыйпамызды атқарыўда жаңаша қатнас жасаўды талап етеди.
 

Д.АБИБУЛЛАЕВ,
Қарақалпақстан хабар агентлигиниң хабаршысы


Sa'ne: 18.04.2017 10:25, 238 ma'rte ko'rip shi'g'i'ldi'