Qaraqalpaqstan Respublikasi' Ministrler Ken'esi

Qaraqalpaqstan Respublikasi'ni'n' Ma'mleketlik hu'kimet portali'


АНА ТАБИЯТ ДОРЕТИУШИ БАЛАЛАРДЫН НАЗЕРИНДЕ

Betti PDF ta'rizde ju'klep ali'w Betti PDF ta'rizde ju'klep ali'w (54 Kb)    Versiyasi'    Betti doc ta'rizde ju'klep ali'w (54 KB)

Қарақалпақстан Республикасы Халық билимлендириў министрлигине қараслы республикалық «Бәркамал әўлад» балалар орайында «Экология балалар нәзеринде» экофестивалы шеңберинде таңлаў болып өтти.«Жасыл планетамыздың тәғдири өзимиздиң қолымыздаӘ» сүрени астында өткерилген илаждың тийкарғы мақсети, жас әўладтың экологиялық мәдениятын арттырыў, олардың санасында тәбият ҳәм қоршаған орталықты сақлаў және қорғаўға болған қызығыўшылығын раўажландырыў, жасларымыздың диққат-итибарын экология саласындағы машқалаларды шешиў мәселелерине қаратыўдан ибарат. Өзбекистан Республикасы Тәбиятты қорғаў бойынша мәмлекетлик комитети менен биргеликте биринши мәрте өткерилип атырған таңлаў қатнасыўшылары хэнд-мэйд, сүўретлеў көркем өнери (экологиялық плакат), мультимедиа, фотосүўрет бағдарлары бойынша өзлериниң шеберликлерин көрсетти. Олардың мийнетлери төрешилер қурамы ағзалары тәрепинен баҳаланып барылды.
Таңлаў жуўмағында хэнд-мэйд бағдары бойынша Нөкис қалалық «Бәркамал әўлад» балалар орайының қатнасыўшысы Азада Убайдуллаева, сүўретлеў көркем өнери (экологиялық плакат) бағдары бойынша Төрткүл районлық «Бәркамал әўлад» балалар орайының қатнасыўшысы Диёрбек Қурбанбаев, мультимедиа бағдары бойынша Қоңырат районлық «Бәркамал әўлад» балалар орайының қатнасыўшысы Илҳам Жаңабердиев, фотосүўрет бағдары бойынша Шоманай районлық «Бәркамал әўлад» балалар орайының қатнасыўшысы Гүлайым Нурғалиева биринши орынларды ийелеп, таңлаў жеңимпазлары болды.
-Бундай экофестивальдың өткерилиўи, әсиресе, бизиң аймағымыз ушын оғада әҳмийетли,-дейди республикалық «Бәркамал әўлад» балалар орайы директорының орынбасары Гүлчеҳра Қонысбаева.- Биринши мәрте өткерилип атырғанлығына қарамастан қалалық ҳәм районлық балалар орайларының қатнасыўшылары белсене қатнасты. Бул демек, бизиң балаларымыздың экологияға, ана тәбиятымызға ҳәм қоршаған орталығымызға бийпәрўа емеслигин көрсетеди.
Таңлаў жеңимпазларына шөлкемлестириўшилер тәрепинен Ҳүрмет жарлығы ҳәм естелик саўғалары тапсырылды.

Д.АБИБУЛЛАЕВ,
Қарақалпақстан хабар агентлигиниң хабаршысы.


Sa'ne: 18.04.2017 10:27, 239 ma'rte ko'rip shi'g'i'ldi'