Qaraqalpaqstan Respublikasi' Ministrler Ken'esi

Qaraqalpaqstan Respublikasi'ni'n' Ma'mleketlik hu'kimet portali'


O`ZBEKISTANDA ISLAM TSIVILIZATSIYASI ORAYI SHO`LKEMLESTIRILEDI

Betti PDF ta'rizde ju'klep ali'w Betti PDF ta'rizde ju'klep ali'w (53 Kb)    Versiyasi'    Betti doc ta'rizde ju'klep ali'w (53 KB)

Prezidentimiz Shavkat Mirziyoev 2017-jıl 21-aprel` ku`ni Tashkent qalasının` Almazar rayonına sapar etiwi waqtında Imam Termiziy jome meshitin rekonstruktsiya etiw boyınsha tapsırma bergen ha`m Ha`zireti Imam (Hastimam) kompleksinde Islam ma`deniyatı orayın sho`lkemlestiriw usınısın bildirgen edi.

Ma`mleketimiz basshısının` 2017-jıl 23-iyun`degi «O`zbekistan Respublikası Ministrler Kabineti janında O`zbekistandag`ı Islam ma`deniyatı orayın sho`lkemlestiriw ilajları haqqında»g`ı qararının` orınlanıwı shen`berinde ken` ko`lemli jumıslar a`melge asırılmaqta.

Shavkat Mirziyoev 1-sentyabr` ku`ni Ha`zireti Imam (Hastimam) kompleksinde bolıp, bul oraydın` joybarı menen tanıstı.

Elimizde muqaddes dinimizdi, ulamalarımızdın` bay miyrasın u`yreniwge, tariyxıy esteliklerdi qa`sterlep saqlawg`a ayrıqsha itibar qaratılmaqta. Samarqandta Imam Buxariy xalıqaralıq ilimiy-izertlew orayı sho`lkemlestirilmekte, Sherabad rayonındag`ı Abu Ali Isa Muhammad Termiziy, Qarshı rayonındag`ı Abul-Mu`iyn Nasafiy zıyaratxanalarında ha`m basqa da orınlarında qurılıs-on`law jumısları orınlanbaqta.

Usı sıyaqlı sawaplı jumıslar jerleslerimiz ha`m xalıqaralıq ja`miyetshilik ta`repinen ken` qollap-quwatlanbaqta. Solardı esapqa alıp, ma`mleketimiz basshısı Islam ma`deniyatı orayının` atın Islam tsivilizatsiyası orayı, dep o`zgertiw usınısın bildirdi.

Joybarg`a bola, bul orayda akademiya, kitapxana, arxiv ha`m qoljazbalar fondı sho`lkemlestirilip, olardı bu`gingi O`zbekistan u`lkesinen jetisip shıqqan ullı oyshıllar ha`m ulamalar ta`repinen tiykar salıng`an ilimiy ha`m diniy mekteplerge baylanıslı elimizde ha`m shet ellerde saqlanıp atırg`an a`yyemgi qoljazba ha`m tasbaspa kitaplar, tariyxıy da`lil ha`m hu`jjetler, arxeologiyalıq tabılmalar, a`sbap-u`skeneler, usı bag`dardag`ı zamanago`y ilimiy-izertlew jumısları, video ha`m foto hu`jjetler menen bayıtıw, 300 orınlıq konferentsiya zalın qurıw na`zerde tutılg`an.

Biz babalarımız benen ba`rqulla maqtanıp kelgenbiz, dedi ma`mleketimiz basshısı. Solay eken, o`zimiz de olarg`a mu`na`sip bolıwımız kerek. Sho`lkemlestirilip atırg`an orayda da bunın` ushın barlıq sharayatlardı jaratıw, jetik ilimpazlardı tartıw za`ru`r. Bul tarawg`a baylanıslı a`debiyatlardı ja`mlew, shet ellerde bolsa, elimizge alıp keliw ilajların ko`riw za`ru`r. Bunnan tısqarı, elimizdegi diniy bag`dardag`ı tog`ız orta arnawlı ha`m eki joqarı oqıw ornı da orayg`a o`tkeriledi. Bul jerde sabaq beretug`ın oqıtıwshılardın` bilimi ha`m da`rejesine ayrıqsha itibar qaratıw za`ru`r.

Shavkat Mirziyoev oraydın` qurılısı boyınsha usınılg`an joybarg`a ayrıqsha itibar qarattı.

Bul oray islam dinin u`git-na`siyatlawda ju`zimiz boladı. Solay eken, onın` sırtqı ko`rinisine, bul jerde paydalanılatug`ın qurılıs materiallarına da itibar qartıw lazım. A`dettegi, ko`zimiz u`yrenip qalg`an joybarlardan waz keship, jan`a forma ha`m dizayn tabıwımız kerek, dedi ma`mleketimiz basshısı.

Joybarlarda oray qurılısı mu`na`sibeti menen basqa orıng`a ko`shiriletug`ın xalıq ushın qurılatug`ın zamanago`y jan`a turaq-jaylar haqqında mag`lıwmatlar da o`z ko`rinisin tapqan.

Prezidentimiz ma`mleketlik ha`m ja`miyetlik sho`lkemler, Musılmanlar ma`kemesi basqarması, imam-ka`tipler, ma`ha`lle belsendileri menen so`ylesti.

 

Abu Bakir WROZOV,

O`zAnın` xabarshısı


Sa'ne: 05.09.2017 16:03, 96 ma'rte ko'rip shi'g'i'ldi'