ҚАРАҚАЛПАҚСТАН РЕСПУБЛИКАСЫ МИНИСТРЛЕР КЕҢЕСИНИҢ ҚАРАРЫ

Өзбекистан Республикасы Министрлер Кабинетиниң 2016-жыл 
6-майдағы «Қарақалпақстан Республикасында балықшылық тараўын және де раўажландырыў ис-илажлары ҳаққында»ғы
145-санлы қарары ҳаққында

 

Қарақалпақстан Республикасының Мойнақ районында балықшылық тараўын және де раўажландырыў, "Жалтырбас", "Судочье" ҳәм ''Рыбачье'' тәбийғый суў бассейнлериниң балық өнимдарлығын асырыў, жаңа жумыс орынларын жаратыўға, халықты жоқары сапалы балық өнимлери менен тәмийинлеўге байланыслы ўазыйпаларды шешиўге комплекс жантасыў, сондай-ақ жоқарыда атап өтилген тәбийғый суў бассейнлерин балықландырыўды нәтийжели шөлкемлестириў мақсетинде Қарақалпақстан Республикасы Министрлер Кеңеси

 

Қ А Р А Р   Е Т Е Д И:

 

1. Өзбекистан Республикасы Министрлер Кабинетиниң 2016-жыл 6-майдағы «Қарақалпақстан Республикасында балықшылық тараўын және де раўажландырыў ис-илажлары ҳаққында»ғы 145-санлы қарары орынлаў ушын басшылыққа алынсын.

2. Өзбекистан Республикасы Министрлер Кабинетиниң жоқарыдағы қарары менен:

а) Қарақалпақстан Республикасы Министрлер Кеңеси, Өзбекистан Республикасы Тәбиятты қорғаў мәмлекетлик комитети, Өзбекистан Республикасы Аўыл ҳәм суў хожалығы министрлигиниң:

Мойнақ районы ҳәкимлиги жанында "Мойнақ аква санаат" мәмлекетлик  унитар кәрханасын (кейинги орынларда '‘Мойнақ аква санаат" МУК деп аталады) шөлкемлестириў;

Қарақалпақстан Республикасының Мойнақ районында жайласқан "Жалтырбас" (17280 га), "Судочье" (19000 га) ҳәм "Рыбачье" (3000 га) тәбийғый суў бассейнлерин (кейинги орынларда суў бассейнлери деп аталады) балықшылық тараўын раўажландырыў ушын белгиленген тәртипте "Мойнақ аква санаат" МУКқа турақлы өз алдына пайдаланыў ушын бериў ҳаққындағы усынысларына разылық берилгенлиги;

б) Төмендегилер "Мойнақ аква санаат" МУКтың тийкарғы ўазыйпалары есапланғанлығы:

суў бассейнлерин келешекте балықландырыў ушын балық шабақларын жетистириў мақсетинде суў бассейнлери аймағында балық питомниклери   ҳәм инкубация цехларын шөлкемлестириў ҳәм олардың искерлигин тәмийинлеў;

суў бассейнлеринде садок усылында балық жетистириў технологияларын жаратыў ҳәм енгизиў жумысларын шөлкемлестириў;

суў бассейнлери аймағында ҳәўескерлик ҳәм спорт мақсетиндеги балық аўын, туризмди раўажландырыў;

балық аўлаў көлемин көбейтиў, бәсекеге турарлық балық өнимлери ҳәм ярым таяр өнимлерди ислеп шығарыў бойынша технологиялық процесслерди басқышпа-басқыш қәлиплестириў;

в) Төмендегилер:

"Мойнақ аква санаат" МУКтың басқарыў хызметкерлериниң шекленген  саны 9 штаттан ибарат болған басқарыў структурасы 1-қосымшаға муўапық:

Қарақалпақстан Республикасының Мойнақ районындағы "Жалтырбас", "Судочье" ҳәм "Рыбачье" тәбийғый суў бассейнлерин және де раўажландырыў ҳәм биологиялық ресурсларынан мақсетке муўапық пайдаланыў ис-илажлары комплекси 2-қосымшаға муўапық тастыйықланғанлығы;

г) Қарақалпақстан Республикасының Мойнақ районы ҳәкимлиги "Мойнақ аква санаат" МУКтың шөлкемлестириўшиси есапланыўы:

"Мойнақ аква санаат" МУК өз хызметин толық өзин-өзи қаржыландырыў тийкарында әмелге асырыўы, ислеп шығарыў – хожалық ҳәм қаржылық хызмет мәселелерин бийғәрез шешиўи белгиленгенлиги;

д) "Ипотека-банк" АКИБке Қарақалпақстан Республикасының Мойнақ районындағы "Жалтырбас", "Судочье" ҳәм "Рыбачье" тәбийғый суў бассейнлерин  және де раўажландырыў ҳәм биологиялық ресурсларынан мақсетке муўапық пайдаланыў бойынша тастыйықланған ис-илажлар комплексинде нәзерде тутылған илажлардың орынланыўын қаржыландырыў ушын "Мойнақ аква санаат" МУКқа белгиленген тәртипте кредитлер ажыратыў усыныс етилгенлиги;

е) Қарақалпақстан Републикасы Министрлер Кеңесине бир ай мүддетде:

Мойнақ районы ҳәкимлиги тәрепинен "Мойнақ аква санаат" МУКтың уставы тастыйықланыўын ҳәм оның мәмлекетлик дизимнен өткизилиўин;

"Мойнақ аква санаат" МУКтың атқарыўшы аппараты тастыйықланған структура ҳәм штатлар кестесине муўапық пуқта таңлаў тийкарында жоқары қәнигели маманлар менен толтырылыўын тәмийинлеў;

"Мойнақ аква санаат" МУК Қарақалпақстан Републикаси, Мойнақ районы, Әжинияз көшеси, 77-жай мәнзилине жайластырыў тапсырылғанлығы мағлыўмат ушын қабыл етилсин.

3. Қарақалпақстан Республикасы Тәбиятты қорғаў мәмлекетлик комитети, Қарақалпақстан Республикасы Аўыл ҳәм суў хўжалығы министрлиги, Өзбекистан Республикасы Илимлер Академиясының Қарақалпақстан Республикасы бөлими, "Ипотека-банк" АКИБ, Мойнақ районы ҳәкимлиги:

белгиленген мүддетлерде Мойнақ районындағы "Жалтырбас", “Судочье" ҳәм “Рыбачье" тәбийғый суў бассейнлерин  және де раўажландырыў ҳәм биологиялық ресурсларынан мақсетке муўапық пайдаланыў бойынша тастыйықланған ис-илажлар комплексинде нәзерде тутылған илажлардың орынланыўын тәмийинлеў;

20 күн мүддетте Мойнақ районы ҳәкимлиги тәрепинен "Мойнақ аква санаат" МУКтың уставы тастыйықланыўын ҳәм оның мәмлекетлик дизимнен өткизилиўин;

"Мойнақ аква санаат" МУКтың атқарыўшы аппараты тастыйықланған структура ҳәм штатлар кестесине муўапық пуқта таңлаў тийкарында жоқары қәнигели маманлар менен толтырылыўын тәмийинлеў;

"Мойнақ аква санаат" МУКты Қарақалпақстан Републикасы, Мойнақ районы, Әжинияз көшеси, 77-жай мәнзилине жайластырыў;

әмелге асырылған жумыслар нәтийжеси бойынша ҳәр шерек жуўмағы менен  Қарақалпақстан Республикасы Министрлер Кеңесине жазба мағлыўмат  бериў тапсырылсын.

4. Усы қарардың орынланыўын қадағалаў Қарақалпақстан Республикасы Министрлер Кеңесиниң Аўыл ҳәм суў хожалығы мәселелери бойынша секретариатына (Қайпов) жүкленсин.

 

 

Қарақалпақстан Республикасы Министрлер Кеңесиниң Баслығы

 

 

Б.Янгибаев

 

Ko'rib chiqildi: 4167