Тәжикстан Республикасының Душанбе қаласында Өзбекстан-Тәжикстан исбилерменлер кеңесиниң биринши мәжилиси болып өтти.

Оған Өзбекстан саўда-санаат палатасының баслығы А.Икрамов, Тәжикстан Саўда-санаат палатасының баслығы Ш.Саид, тийисли министрлик ҳәм ведомстволардың басшылары, еки елдиң 120 дан аслам киши бизнес ҳәм жеке исбилерменлик субъектлериниң басшылары қатнасты.

Өзбекстан — Тәжикстан исбилерменлер кеңеси 2017-жылдың 11-октябринде шөлкемлестирилген болып, экономикалық бирге ислесиўди кеңейтиў, исбилермен ҳәм қаржылық шеңберлер арасында тиккелей байланысларды жолға қойыў, көп тәреплеме жойбарларды әмелге асырыўға көмеклесиў, еки мәмлекеттиң бизнес топарларының ўәкиллерин бирлестириўде үлкен әҳмийетке ийе.

Илажда атап өтилгениндей, соңғы жылларда Өзбекстан ҳәм Тәжикстанда экономикалық раўажланыўдың алдынғы системалары кеңнен енгизилип атырғаны және жергиликли кәрханалардың бәсекиге шыдамлылығы артып атырғаны еки ел арасындағы саўда-экономикалық байланысларды раўажландырыўда әҳмийетли қәдем болмақта.

Саўда-экономикалық ҳәм инвестициялық бирге ислесиўдиң буннан былай да раўажланыўына көмеклесиў ушын қосымша илажлар шөлкемлестириў, бизнес ўәкиллериниң арасында ири форумлар, көргизбе ҳәм ярмаркалар өткериў зәрүрлиги атап өтилди.

Мәжилисте түрли тараўлар бойынша нәтийжели келисимлерге ерисилди. Кеңестиң екинши мәжилисин усы жылдың екинши ярымында Ташкентте өткериў бойынша келисип алынды.

ӨзА