Qaraqalpaqstan Respublikasi' Ministrler Ken'esi

Qaraqalpaqstan Respublikasi'ni'n' Ma'mleketlik hu'kimet portali'


Қорақалпоғистон Республикаси Вазирлар Кенгашининг янги расмий веб-сайтига ўтиш. http://karakalpakstan.uz

ДОСЛЫҚ ҲӘМ БИРГЕ ИСЛЕСИЎДИҢ ЖЫРЛАНЫЎЫ

Betti PDF ta'rizde ju'klep ali'w Betti PDF ta'rizde ju'klep ali'w (57 Kb)    Versiyasi'    Betti doc ta'rizde ju'klep ali'w (57 KB)

Воспевая дружбу и сотрудничество

«Өзбекистан» халықаралық әнжуманлар сарайында 23-июнь күни Шанхай бирге ислесиў шөлкеми Мәмлекет басшылары кеңесиниң Ташкент саммити қатнасыўшылары ушын концерт бағдарламасы көрсетилди.

Шанхай бирге ислесиў шөлкеми ушын бундай илажлардың өткерилиўи дәстүрге айланған.

Саат 18.00. Залға Өзбекистан Республикасы Президенти Ислам Кәримов, Қазақстан Республикасы Президенти Нурсултан Назарбаев, Қытай Халық Республикасы Баслығы Си Цзиньпин, Қырғызстан Республикасы Президенти Алмазбек Атамбаев, Россия Федерациясы Президенти Владимир Путин, Тәжикстан Республикасы Президенти Имомали Раҳмон, Аўғанстан Ислам Республикасы Президенти Ашраф Ғани, Манголия Президенти Цахиагийн Элбэгдорж, Пакистан Ислам Республикасы Президенти Мамнун Ҳусайн, Ҳиндстан Республикасы Бас министри Нарендра Моди,  Түркменстан Президенти Гурбангули Бердимуҳамедов, ШБШ Бас хаткери Рашид Алимов кирип келди.

48.JPG

Жыйналғанлар жоқары мәртебели мийманларды қол шаппатлаўлар менен күтип алды.

ШБШ Мәмлекет басшылары кеңесиниң юбилей саммити концерт пенен басланғанында терең символикалық мәни жәмленген. Өйткени, мәденият ҳәм көркем өнер халықлардың өз-ара жақынласыўы ҳәм бирин-бири түсиниўи ушын өзине тән қурал саналады, себеби, музыка шегара ҳәм аралық таңламайды. Сонлықтан «Өзбекистан» халықаралық әнжуманлар сарайында дослық ҳәм бирге ислесиў орталығы ҳүким сүрди.

Жоқары мәртебели мийманлардың дыққатына өзбек халқының миллий қосықлары ҳәм аяқ ойынлары, сондай-ақ, жәҳән опера өнериниң ең сайланды шығармаларынан үлгилер усынылды.

Өзбекистан көркем өнер шеберлериниң шығыўлары алғыслар менен күтип алынды. Өзбекистан халық артисти Муножат Йўлчиеваның атқарыўындағы «Ол ким жанан» қосығы тыңлаўшыларда умытылмас тәсир қалдырды. «Өзбекистан» ҳәм «Наўрыз» аяқ ойын ансамбллериниң атқарыўындағы «Ойынлар гүлдәстеси» хореографиялық композициясы өзбек аяқ ойын мектебиниң пүткил гөззаллығын көрсетти.

«Шарқ тароналари» халықаралық музыка фестивалының жеңимпазы Нодра Пирматова «Эй дилбар жананым» қосығын ЮНЕСКОның Репрезентатив дизимине киргизилген үлкен қосық усылында атқарды.

Өзбекистан жаслар симфониялық оркестри П.Чайковскийдиң «Евгений Онегин» операсынан үзинди атқарды. Әлийшер Наўайы атындағы Өзбекистан мәмлекетлик академиялық үлкен театрының қосықшылары Ш.Гуноның «Роме ҳәм Жульетта» операсынан Жульетта вальсин атқарды.

Өзбекистан халық артисти Нармумин Султанов ҳәм «Ниҳол» сыйлығының лауреаты Маъсума Болтабоева «Мениң жанажан Қытайым», Өзбекистан халық артисти Зулайҳо Бойхонова «Қәдирданларым» қосықларын қытай тилинде атқарды. Қазақ, қырғыз, тәжик, түркмен, қарақалпақ халықларының қосық ҳәм аяқ ойынлары да атқарылды. Өзбекистанда хызмет көрсеткен артист Жеңисбек Пиязов «Маған бериң намаларды», халықаралық таңлаўлардың лауреаты Милена Матмусаева, «Муҳаббат жаңғырығы» деп аталған белгили орыс қосықларын атқарды. Концерт бағдарламасы ШБШға ағза мәмлекетлердиң бай мәденияты менен және де жақыннан танысыў имканиятын берди.

Атқарылған ҳәр бир нама-қосықта инсанға меҳир-муҳаббат, өз-ара ҳүрмет, кеңпейиллик, миллетлераралық татыўлық, миллий ҳәм улыўма инсанийлық қәдриятларға ҳүрмет жоқары перделерде жырланды. Концерт жуўмағында «Жан Өзбекистан» композициясы жаңлады.

ӨзА

 


Sa'ne: 23.06.2016 23:02, 5872 ma'rte ko'rip shi'g'i'ldi'